alangalangkumitir

Javanese Manuscripts

SERAT NIRARTHA PRAKRETA


R.M. Ng. Prof. Dr. POERBATJARAKA

Zang I.

1.
Santawya ngwah i jon bhatara paramarthatyanta rih niskala.
sah tan sah sinamadhi mungwi tenahin hret-tikta cunyalaya.
suryopama siran prakaca menuhi sarwatma diptojjwala.
byaktawas kahidep swa-dipa sumeno lumren manah niccala.

2.
Ndah yan mankana lot sayojya hana rin cittaticuddhottama.
mangeh sadhananinwan amrih ateken lamban gumegwan karas.
nahan donkun amuspa rin pratidineh ratryamalar sanmatan.
pinten karananin wenan rumacananan cabdatemah bhasita.

3.
Ngwan pwatyanta wimohitapan alewes tuccha kanisten sarat.
ndan duran wruha marna-marna rasanin gastrartha-widyagama.
anhin duhkita kewalamrati sumok lwir andhakaranasut.
tan wruh panlwananin laranupama hetunkwaniket lambana.

4.
Duran manduka yan pamuktya waninin tunjun prakirnen banu.
ekastha rahinen kulem tathapi tan wruh punyanin pankaja.
bheda mwan gatinin madhubrata saken doh ndan wawan sparqaka.
himper mankana mudhaninwan anuker jon san widagdhen naya.

5.
Rin prajnadhika mitranin suka lawan swargatidiwyenusir.
yan rin durgati duhka mitranikihen sthiraniket tan kasah.
yan rin buddhi mahaprakopa taya len tan papa mitraniwo.
ndah yekin tri pamitra-sancaya gegon tekan sayogyalapen.

6.
Sanksepanya lana prihen pinaka mitra sadhu cantakreti.
lawan haywa minitra tan kujana durtawas maweh wadhaka.
ton tan hansa mamitra wayasa sagotranyan wicirnapejah.
ndah manka jana durwiweka tumemu n wighna nda tanpopama.

7.
Anhin tan sipi mewehin wan iki tan prajna wiwekanulus.
prajnanindita towi meweh ika san mahyun pamujen hayu.
yadyan pujita karma dura tan anemwa jnana meweh temen.
san hyan cakra tuwin winodhana sawetnyatyantanin durlabha.

8.
Byaktekan kakaniccayan rusitikan twas nhin sudhairya n manah.
kadyanganin amet bhinukti manarembha dhanya sanken lemah.
lot mritya. mateken paragraya mijil wwahnin tinandurnira.
pangil rakwa samankanekana n asadhyahyun manemwan phala.

Zang II.

1.
Tan lyan rin manusir gunadhika canaih-canaih kramanika.
lawan tinkahi san widagdha manamer su-ratna-wanita.
mwan buddhinta masewaken nrepati len maren qiragiri.
ndah yekan pwa catur prakaranika tan dadi n geli-gelis.

2.
Rin cuklendu samatra tambayanikaweweii kedi-kedik.
riri plaksalpika suksma wijanika ghora ta pwa tumuluy.
manka n satpada panhisepnya madhu nitya mogha mapupul.
tadwat mankana rin lanotsaha temahnya purna wekasan.

3.
Lawan salwiranin gunadyapi tan arghya yogya ya gegon.
drestan tan kriya-banyageka wiwidha n swa-banda tinenet.
donyapet karananya mentasa ri sarwa-bhumi n usiren.
donyasin pinalakwa tumbasenikan wwan aywa katunan.

4.
Sampunyan pada wreddhi n artha salekasnikaphala tuwin.
nda tan warsih amet muwah sahananin minulya rin aji.
mamrih kwehani gatyanin gaway anindya lana temunen.
“rapwan panguhaken wicesa-mani jiwa-tulya” linika,

5.
Sansiptan taya len sudharma wekasih hinuttama dhana.
kwehnin hema suratna bhusana winaca-jati rasika.
stri len putra sawandhu santana nahan ya mogha mapasah.
mukya h jiwita towi meweh ika rin ksana krama hilan.

Zang III.

1.
Rin laksmi makahinan in greha taman winawa ri sedenin paratrika.
nkanen gmasana hinanin swa-kula wandhawa weka-weka bharya tan waneh.
nbin tan karmika purwa yan sukreta duskreta manuduhaken teken paran.
dharmadharma tinutnya (selwana)salakwa dadi milu manuntun in henu.

2.
Apan tan hana len nimittanin amanguh ala sinaputin putek hati.
sanken karmika wreddhi kopa dadi lobha temahanika moha tan surud.
sanken moha si mada, mada dadi matsara kujana katungka garwita.
ndah yan mankana tan wurun tumemu pataka saka ri wimudhanin hidep.

3.
Atyanten atighoranih tasik awas kalanuyan i gatinya mankana.
lawan koddhretanin manik ri tutukin kupita-makara yeka tar manel.
krura n taksaka dadya puspa sama rin hulu kasuhuna wastu pangihen.
tan manka n gata-buddhi ya pratiniwista kadawutanikardha bhisana.

4.
Chatra stambha ya tejanin rawi mawas katahenani panasniradbhuta.
byakta n we wenananya yan mamejahen apuy aticaya diptakojjwala.
matta n naga tan arikucamatehaken, lara sabhaya si tamba panhreta.
ndan rin murka jugeki tan hana pakosadha n amateha dadya mardawa.

5.
Tiksna n pawaka mogha tan salabha muhsira riya sahajan paweh suka.
mungwih panjara towi tan papikat asran inusinikan arja paksika.
wetnih hyunya manancaye hayuni qabdanika lalita komalanulus.
keket rin wekasan tekapnin atiharsanika karananih kaduhkitan.

6.
Tadwatmankana tan samasta-jana tan dadi wenana dhumarana n manah.
denin raga lanahiket lewu subaddha ri hatinikanari sarat kabeh.
hetunyan mapageh keta n mada withoha manah atisumok nirantara.
byaktande wiparita tan wurun anutaken iki ri sasestinin hidep.

7.
Hinanyan lalu gaktinih hyun iki yan linagan, in apa denya konkaba.
yapwan pinrih ilannya manhilanaken tutur amuhara coka mohita.
yan sinyuh magawe prapanca niyatandani turida manunca.hin lutut.
yan winwan iniwo makin pinaka wisti pinaka hawanin kapataka.

Zang IV.

1.
Karmendriyeka maka mangalanin swacitta.
kamendriyan pinaka marga mamicren suksma.
ndan san huwus wruh i panuksmanikan ya manka.

2.
Wanten wretatwa wekasin paramatiguhya.
byapin pradhana pada litnika tanpa hinan.
tan dwa wibhajya bahubheda mawreddhi-wreddhi.
nyan pancawinca saha catwariwinqa tatwa.

3.
Yeka nimittanikanan sahanen triloka.
sthuladi tatwa kateken dwidacanga tatwa.
mwan bhuta panca kalawan lima matra tatwa.
ahhin rwa hetunika yan paripurna nitya.

4.
Rin pancabhuta guna len lima matra siddhi.
maride wikalpa hana rin hati lot humandel.
lilamanun turida raga lulutnikan twas.
harsen katon sakarend kaharas tekapnya.

5.
Ngka yan pamreddhi wekasan tikan indriyartha.
kamendriyadinikahen wisayanya purna.
sarwesta rin rasa sugandhika len swarupa. (surupa)
mwan sarwa wastu katenin hati mogha tresna.

6.
Hinanya nirmala lawan malinatwa kirna.
mungwin swabhawanikanan dadi sarwajanma.
Jumren jagat mamenubi lwanin andabhumi.
apan sira prabhu wibhuh nirakara ring rat.

7.
Manka swajatinika kalih anopalabdhi.
kapwatisukstna sumilib ri manah tan imba.
durgrahya grehyakawiceda mahaprameya.
ekaswabhawa sira karwa wibhinnapaksa.

8.
Himper wulan lawan ikan gacacihna drestan.
nya tekihen wenana len kahananya mungu.
yawat lananemuki satmaka wighna saksat.
tawat tumut sumuluh in sakalanda lumrah.

9.
Ndah mankana n hala hajen gumelar hanen rat.
duran wiyoga saka ring patemunya karwa.
murigwin trikaya kawanun tekapin swacitta.
solah sagabda samanah maka sadhananya.

10.
Yeki n tri hetukanikan umusir yamanda.
yapwan sininhitakening hala karmikande.
yekin tri hetunin amanguhaken triwarga.
yan sinhitin hayu n ulah ginawe pwa nitya.

11.
Anhin tri-kaya paramartha wicuddha marga.
ambalnikan pada wimoksa niratma micra.
nahan matannya dina ratri ya tolaheka.
rapwan tumemwaken awaknin acintyatatwa.

Zang V.

1.
Nhih durlabha dahaten ikan trikaya pagehanya wimala satata.
sanken hala ta rusitikan pinet sthiti haneriya manulahaken.
pohnin paramarasa rahasya nugraha lanamenuhi maniluman.
tan matra kawenan yadin prihen lewu wilaksana siran inusir.

2.
Pujarcana sahana widhikriyacjrayakenanta pinaka carana.
mwan dhyana saha japa samadhi yoga panupaya sakala regepen.
tan byakta tika karananih tumemwa wekasin parama kasugatin.
yan tan wruh i patitisi sandhinin samaya nisphala sahananika.

3.
Apan sahana-hananikan prayoga pinakesti sira juga tedun.
ndah mogha mawaka rikan angego smreti tekasuna wara, kahidep.
tan wruh yadi sira hana rin swabhawa tinelen milu manelenaken.
nir sadhana sira maka sadhanen hayu sadanilib in anen’anen.

4.
Lwir bahni wekasin atisuksma tan sipi haneh kayu-kayu sahana.
ndah yan tutuhana wadunen pajun kapana yann umijila n anala.
nhin yan wruhanikanan anuswaken lalu sawega lekasanikahen.
byaktotpadanikan apuy dumagdhakena wreksa pinenuhan ika.

Zang VI.

1.
Iwa mankaneki gati san hyan umibeki samuhanin dadi.
ya mawak pawak ya ginawe gumaway ikan acintya niskala.
sasinadhyanin tapa masadhya rin angulahaken giwarcana.
hana tan tumut tuwi tumut ta ya raket i sapolahin sarat.

2.
Rin apan kawastwan i siran grahana tubu widehalaksana.
ya matannya durgama kapangihanika tekapin mamet hayu.
humenen nda tan wenan atarka ri karegepanin samankana.
katunan tutur hidepikan lebar abalika wreddhyanin lupa.

Zang VII.

1.
Asih ulahanikan wwan tan byakta nya kinatayan.
padanira hana ri nika lwir maya taya tinuduh.
ya karananira san wruh nir tan sadhya telenana.
smretinira juga langen nimnajnana cuci sada.

2.
Ri henenikanan ambek tibralit mahenin aho.
lenit aticaya cunya jnananacraya wekasan.
swayen umibeki tan rin rat mwan deha tuduhana.
ri panawakira san hyan tatwadhyatmika katemu.

3.
Ndan i huwusira manka san sampun kretasamaya.
tri-mala malilan in cittande cuddha tanu sada.
lara pati putekin twas ndin sandehan ika kabeh.
geseni manahirapan rudratma sakala wibhuh.

Zang VIII.

1.
Mankana rakwa san telas anemwaken pada wigesa guhyasamaya.
tan manawastha tan hidep amicra suksma ri bhatara satmika lana.
linga manahniran sthiti manekadega madeg in ciwalaya sada.
gaktiniraprameya hibeking jagat juga maweh sukapratihata.

2.
Na lwiri san tepet manemu yoga sandhinin acintya sasmreti sada.
tan swacarira kewala wiguddha nirmala tekaparatmaka kabeh.
swartha parartha sadhyanira tan wurun mudani harsanin parahita.
yeka panihnanin sakalamurti san hyan apagoh umandel i sira.

3.
Len hana nista madhya lawan uttaman pada kininkinin hayunika.
mwan karananya mentasa saken aweci musira n sukadhikapada.
yan mulatin parahemu suduhkitalara dahat hidepnira tumon.
ri wruhi tanpa bhedanira mulanin bhuwana jati tungal ikahen.

Zang IX.

1.
Tan manka janaloka buddhi winanunya tan amuhara treptinin hidep.
ndan bwat dwesa gatinya rin paraguna, swaguna juga lewih wuwusnika.
gonnih dosa hinotakenya ri carira kinekesika tan kaniccayan.
anhin yan hana dosa-matranikanan parajana winulik winarnana.

2.
Lyan tekan hati tustacitta ri sedehnika n umulati duhkanin waneh.
irsyen wan tumemu n sukanalah ulah karananira manemwa duhkita.
nindyeri sadhu mahardhike manah anindya winalin agawe kaduskretan.
gonnin krodha madeg yadin calana, henti sumukitanikan hinastawa.

3.
Tan tungal mara sampaying nara, wimurka, tumaya-taya rin huwus mahan.
nirsandeha cumodya solahira san jenek anulahaken kasatwikan.
“yeku bhranta wimudha-janma tang amet hyang aputeran aneka laksana.
lecyanyan turunin wruh in gati” nahan panucapira manalpika- Iwero.

4.
Ndah mankambekikan qatagelem apet rin analahi n ulah nya nityasa.
lobhe dhih umaku wiqesa tinemunya ri turunin acihna rin praja.
ndan qabdanya jugalepas lwiraniki n kalilinan atikadbhutapatuk.
anhin tan kawenan miber sthiti hanen kuwunika ri wipaksanin tanu.

5.
Nistanyan pwa ya mankana n gati taman surud anekani sestinin hati.
tan seneh yadin asyana h para tekapnikan awedi kasoran in naya.
wetnin hyunya pujin stutin ya linika “bhuwana lepasa denku tan wurun”.
simbantenn iki yan makarya ya jugan winawanika ri tambragomuka.

Zang X.

1.
Tan mankambek munindraticaya nipuna rin sarwa tatwopadeca.
tan sahken lobha yar sorakeni sahananih loka kapwapranamya.
sanka ry asihnira n hetunika pada musap joh lananghyan masewa.
warsajnanopacantanirami manahikan rat dumeh harsacitta.

2.
Tekwan tan sanka rin pintanika ri datengin sarwa ratnopakara.
wetnyatyanten mahasiddhinira kumawaqen rat taya n langhaniya.

3.
Apan prajna suluh san yatiwara masawan bahni candrarka dipta.
rin wahyadhyatmika n anga rinadinanira n qatru yanken peteng sok.
dhwasteka nan tamahnin hati sahananikan papa len kleqa cirna.
lila-lilan panicchen bhuwana tekapikan jnana caktyaniwarya.

Zang XI.

1.
Samanka tinkahnira san huwus mahan.
mahojjwalen jnana lumon prabhaswara.
prabhaswaren rat supenuh nda tan katon.
katon tikan wastu susuksma denira.

2.
Nirantararthatwa mapinda tan luput.
luput rin anga mwan in anda yan, pinet.
pinet maner in hati muksa tan hilan.
hilahnikamicra mawor nda tan pawor.

3.
Paworniken atma makeka rin tutur.
tutur sadakala sunispreheng sarat.
sarat hilah mwan ri hidep maluy malit.
malit saken litnin acintyaniskala.

4.
Kalah tikan sadripu cirna denira.
niragraha citta wicuddha nirmala.
malanaput tanpa napel kawes humur.
humur dumohi wisayanya nityaca.

5.
Salah-kena n lokika mogha tan tinut.
tinut rin ambeknira tan grahomeneng.
meneng mido lalu wicintya tan lebur.
lebur nirakara niraksaratmaka.

6.
Makantya tekana ginuhya rin hati.
atita rin kirya kabeh ya nisphala.
phalanya tan matra kasihhiten manah.
manah sumimpen ri huwusnya nirnaya.

Zang XII.

1.
Ya samankana rakwa lekasira san uttama diwyayati.
ginelarnira san guru pananumaten kami mudha dahat.
wiphalan kadi dipa sumeleh atidipta tibeh jaladni.
temahanya padem kakelem i petehih hati lot wipatha.

Zang XIII.

1.
Iwirnifi wadhaka caktinin wisaya catru jaladhi sama kirna tar surud.
rwabhyandurbalani swacitta mawetu n karaketan i temahnya rin sarat.
na hetunkwa n umura karwa lepihan teher akemula kresna jirnaka.
wetnin tan sipi duhka mandagagunen bapa ri panatagin purakreti.

2.
Nahan hinanikan palamban atidurlikita wigati tar wenang linen,
ndan sin cabda riniptaken teka n ujar sarinapini winorku rin rasa.
bhrantajnananikin pitanuluyi putra sawuwusika tulya bhasmaran.
tustenwan yadin asyana n para sadenya cumacada linampuning hulun.

3.
Tekwan tan wihikan gatinku ri rusit-rusitin akawi punya kirtiman.
nhih sinwinutusin yayah medarena katiwasanira nitya kacmala.
hetunkwanis anuksma mogha maparab wedi katenera cihnanin hulun.
eran ngwan sthitihen pradega juga tan maluya wekasanin nirarthaka.

Iti nirarthaprakreta samapta telas rinacana denin ptiputut tan wrin deya 1381 (Caka), un an Saraswatyai namah. Siddhir astu. Sampurna pwa yen kancana. Durga Dewi tan len ika sthananya ring padmambara.

by alang alang kumitir

1 Comment

  1. Ida Ayu Widi Astiti

    terimakasih anda telah memuat serat ini, bisakah anda menterjemahkan dalam bahasa Indonesia, dan tentang penulis serat ini?

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: